11 nye stolpepunkt: Nå startar jakta!

Måndag 15. juni opnar årets Stolpejakt i Sør-Fron. 50 stolpar er plassert rundt i krikar og krokar i kommunen. Det er Fysak-gruppa i Sør-Fron, saman med gode medhjelparar, som planlegg og plasserer stolpar i heile vår vidstrakte kommune. 

- I år har vi elleve heilt nye stolpepunkt i tillegg til at vi har flytta litt rundt på nokre av dei gamle. Som åra før legg vi opp til ei blanding av gode, gamle turmål og litt nye opplevingar, seier tenesteleiar for kultur og næring i Sør-Fron kommune, Bjørn K. Sletten. 

Stolpejakta i Sør-Fron er ein viktig del av folkehelsearbeidet i kommunen, og skal vera både lågterskel og inspirasjon til fysisk aktivitet blant innbyggarar og tilreisande. 

- I tillegg ønskjer vi å bruke Stolpejakta til å lyfte fram dei utruleg mange flotte plassane vi har her i kommunen. Derfor er stolpane plassert både ved naturperler og viktige kulturminne og attraksjonar, seier Sletten. 

Av nye stolpepunkt i 2020 nemner vi Undertjønna, Steinbua i Langvassdalen og Krøkla. Sjå fullstendig oversikt nedst i artikkelen. 

Annleis Stolpejakt enn mange stader 

Stolpejakta i Sør-Fron er litt annleis enn mange andre stader - fordi kommunen er langstrakt og med mange flotte turmål både nede i bygda og oppe på fjellet, er stolpane meir spreidd enn mange andre stader.

- I tillegg får vi kommentarar frå folk som er vande med stolpejakt i meir "sentrale strok", der vanskelegheitsgraden er noko lågare. Dei svarte (vanskelege) stolpane våre, er type toppturar, mens dei grøne skal kunne tas med rullestol. Vi bruker heile skalaen, seier Sletten. 

Det finst og mange andre gode turtips i Sør-Fron, som vi har samla her.

Kva er Stolpejakten og korleis kan eg delta?

Stolpejakten går ut på å finne stolpane som er plassert ut på fjelltoppar og i nærmiljø - registreringa skjer ved at ein skannar kodane på stolpen.  Alt du treng å gjere er å registrere deg på stolpejakten.no. der kan du og legge inn familiemedlemar, slik at eit barn på fem år utan mobiltelefon også kan få registrert sine stolpar. 

Inne i appen finn du også informasjon om dei forskjellige stolpepunkta, og korleis du enklast kjem deg dit.

Om du vil ha fysiske kart over stolpepunkta, kan du laste ned og skrive ut det her. (PDF, 27 MB) Du kan også henvende deg til servicekontoret eller biblioteket for å få hjelp med kart. I år har vi også laga eit digitalt kart som du finn her. 

Gi oss attendemelding!

Dersom du oppdagar at stolpane er fløtt på eller ikkje stemmer heilt overeins med koordinatane på kartet blir vi veldig glade om du seier frå!

Send da ein epost til kultur- og næringsleiar Bjørn K. Sletten: bjorn.sletten@sor-fron.kommune. 

Du kan også gi oss attendemelding på Facebooksida vår.

Stolpejakta i Sør-Fron startar 15. juni og varar heilt fram til 1. november. Du finn alt du treng av opplysningar for å komme i gang med stolpejakt, på stolpejakten.no.

Her er 2020-stolpane, med koordinatar (fargekoder finn du i appen):